仲有唔夠兩個星期就係農曆新年，為幫家中增添新年氣氛，唔少人都會網購啲新春擺設、揮春等嚟佈置。由於今年係馬年，所以唔少揮春都有馬嘅元素，不過就有人發現內地嘅電商平台，今年熱賣嘅其中一款揮春，竟然有電影《哈利波特》系列中「跩哥馬份」（Draco Malfoy）嘅揮春，而呢款揮春熱爆嘅程度，就連外國媒體 BBC 都有報道。
Draco Malfoy於內地翻譯為「馬爾福」，電商因此而食諧音梗以切合今年馬年，於揮春、貼紙等印上Draco Malfoy嘅樣，並寫住「福到啦」，寓意「馬上有福」。雖然與傳統揮春有好大分別，但就意外受網民歡迎，令呢款揮春成為爆款，就連外地網民都紛紛下單購買，事件火爆情度，連BBC等外國媒體都有報道。對於自己突然於內地翻紅，飾演馬份嘅本尊Tom Felton亦有注意到，仲轉發咗多間外國媒體嘅報道，以為fans於家中貼佢嘅揮春短片。
