劉洋 日前同歌迷提前食團年兼為佢喺《萬千星輝頒獎典禮2025》勇奪最佳新人奬慶功，氣氛熱鬧！劉洋唔只同大家一齊開香檳同唱歌，仲用廣東話拜年，又著起財神衫大派利是，令大家都玩得好開心。
自言係首次扮財神嘅劉洋，指喺北方財神有唔同嘅神明同形象，就好像抱住金元寶嘅彌勒佛，亦係財神之一。
劉洋嘅粉絲亦相當寵偶像，除咗慶祝佢勇奪新人獎外，粉絲們仲自製咗一個「永遠的至尊男神」獎座畀佢。而劉洋就再次分享奪得最佳新人奬嘅喜悅，仲話自己好幸運。
身形圓潤嘅劉洋，表示自己即將要減肥修身，因為佢話試過拍戲時著戲服著得唔舒服。對於新年將至，劉洋表示最希望嘅都係自己嘅廣東話可以更進步，最好可以出廣東歌，而佢亦希望可以拍多啲劇同埋有機會開演唱會。
