今個星期《電影泉攻略》主播 王鎮泉 Jeoffrey 同觀眾介紹新鮮熱辣嘅影壇快訊。
已故樂壇天王Michael Jackson嘅傳記電影《米高積遜》仲有兩個月就會同大家見面，今次Michael嘅角色就會由佢親侄仔Jaafar Jackson飾演，外界普遍都認為係完美人選，加上由《波希米亞狂想曲》嘅金牌監製Graham King做製片，令觀眾非常之期待。
呢部電影原定只係拍一集，不過涉及一啲Michael官司嘅場口，因為法律限制而要砍掉重練，所以電影公司就索性改成兩部曲，第一集預計會講到Michael喺80年代尾、事業巔峰嘅時間。
新片速遞
《真人版 秒速5厘米》首部新海誠真人改編電影，講述貴樹和明里小學開始青梅竹馬，後來因為明里搬屋而迫使兩人分開，佢哋喺雪地中嘅櫻花樹下許下承諾將來再見。時光流逝，貴樹喺東京工作，過住封閉嘅生活，從未深度與人互動。而明里亦靜靜地過著日常生活，回憶住以往日子。兩人以唔同速度走過這十八年，前往一個記憶之地。
《東京的士：回憶里程》木村拓哉飾演嘅的士司機，為養家而每日奔波工作，因為種種現實壓力而身心俱疲。某日佢接到一項特別嘅委託，接載一位年邁女士，從東京柴又前往神奈川葉山嘅養老院。呢位女士想喺離開東京前，去幾個地方睇下，殊不知呢趟偶然嘅旅程，為彼此嘅人生留下難忘又美好嘅印記。
MCU電影《雷霆特攻隊*》之前喺上映時，最令人錯愕嘅情節，就係模仿大師出場無耐，講咗一句對白同埋打咗幾下，就畀人射死咗。好多fans都為呢個本來係擔正嘅角色抱不平，仲喺網上發起聲援行動。而飾演模仿大師嘅演員Olga Kurylenko，早排接受訪問時就好多謝粉絲們咁溫柔嘅支持，佢完全估唔到有咁大迴響，只係專注做好演員嘅本分。
今個星期香港票房龍虎榜，截至2月4號中午，第一位《尋秦記》，第二位《阿凡達3》，第三位《腦細天劫》。
