被喻為「天生歌姬」嘅 A-Lin（黃麗玲），宣佈將於4月於紅館舉行一連兩場香港站世界巡迴演唱會。呢場除咗係慶祝A-Lin出道20週年嘅演出外，仲係佢11年後再度踏上紅館舞台嘅演唱會。
是次世界巡迴演唱會喺今年1月於佛山率先啟航，無錫、成都、廈門、上海等多站演出均一票難求。演唱會上A-Lin展現其幽默本色，對眼泛淚光嘅歌迷提出靈魂拷問：「你們到底是來聽我唱歌的？還是來整理自己的人生？」而呢句靈魂拷問更於社交媒體瘋傳。
為咗將呢20年嘅音樂足跡呈現於舞台上，主辦單位斥巨資製作「時光長廊」，以動態光影設計配合 A-Lin 經典作品，令樂迷立即時光穿梭。而喺演唱會首站，A-Lin更特別加入「歌單盲盒」環節，喺Encore 時隨機抽出冷門歌曲，令樂迷驚喜萬分。
A-Lin表示20年話長唔長、話短唔短，所有都係轉眼之間。呢20年嚟A-Lin穿梭唔同城市演出，佢相當珍惜每次唱歌機會，同時喜見樂迷喺佢嘅音樂中「找到了家」。對於A-Lin相隔11年再次踏上紅館舞台，唔少歌迷都期待而久，估計到時門票將會瞬間秒殺。
