吳業坤日前喺多倫多開騷，呢次加國之行仲令佢遇上當地十年嚟最大風雪，氣溫急降到零下16度。不過難得去到當地，坤哥鼓起勇氣走到戶外感受寒風，仲拍埋片擺上網，表示呢趟係「多倫多凍到縮埋之旅」。
雖然好凍，但坤哥亦感恩有呢個機會，仲話：「十幾年前初入行見到其他朋友可以飛咁遠唱歌真係好羨慕，經過大家嘅努力原來我都可以去未知嘅地方開自己嘅演唱會，感恩我擁有一個平凡中帶點不平凡的人生。」而一班歌迷亦相當熱情，演出當日全場爆滿，坤哥亦有落台同大家互動。
不過坤哥呢次開騷，「坤嫂」濱口愛子就似乎冇一齊去加拿大，反而去到韓國旅行。愛子喺社交平台分享嘅濟州島旅行相，身處田野嘅愛子開心採摘柑，仲反問大家，自己係唔係「鄉下妹？」，令唔少網民都大讚佢好可愛啊。