農曆新年將至，各大公司都會搞Annual dinner慰勞一眾員工，唱片公司華納亦唔例外，而佢哋今年更大玩Cosplay動漫人物主題，考驗一眾歌手嘅扮嘢功力。當中玩得最投入，以零偶像包袱豁出去嘅就絕對係 陳蕾 喇！
陳蕾以經典動漫《進擊的巨人》嘅巨人裝現身，唔只套衫揀得好，仲戴埋同款巨人頭套，從頭到腳都高度還原。大家要認得出佢，可能要靠認對眼同把聲先得。最好笑嘅係，陳蕾落車到達酒店嘅片段亦被唱片公司小編擺上網曝光，仲話：「勇奪民選最佳服裝第一名，佢有自己全紀錄，之後應該有片，放住少少先。btw呢架唔係公司車，係佢自己call車。」
從片中可見，酒店工作人員從車門打開想上前服務，但被「巨人」嘅現身嚇到往後縮咗一下，但佢同時好敬業，即使嚇親亦要堅持自己嘅專業，向陳蕾問：「有無嘢要幫你」，被網民讚爆。同時，大家亦被嚇一跳，估唔到陳蕾咁有勇氣，仲有人話要關心一下司機心理陰影面積有幾大呀！
除咗陳蕾，大家喺裝扮上都同樣有心，一樣係蒙面系列嘅就有湯令山、康堤、Nancy Kwai，至於洪嘉豪、張蔓姿、Zpecial、Moon Tang，雖然都係扮演熱門動漫角色，不過就清楚見到個樣，令大家唔駛估估下！
