今個月18號就係肥媽Maria Cordero嘅72歲生日，呢日《中年好聲音4》錄影期間，車婉婉就率領台前幕後，預早送咗一個生日驚喜畀阿媽。雖然生日係開心事，不過阿媽就要婉婉代勞吹蠟燭同切蛋糕。
myTV SUPER重溫《中年好聲音4》
原來係因為有玄學師父同阿媽講，佢今年已經夠多火，所以盡量避免切蛋糕、吹蠟燭，壽桃都唔好食，紅色衫亦唔好著，最好多著有生生不息意思嘅綠色，所以阿媽都好聽話。
阿媽形容，中聲家族就好似佢嘅家人一樣，可以同大家一齊唱歌食飯，已經係一件好幸福嘅事。海兒同谷婭溦祝阿媽身體健康，海兒仲話阿媽係佢認識嘅藝人當中最多工作，所以希望阿媽保持身體健康。阿媽就鬼馬回應，祝海兒快啲搵到另一半可以脫單，仲叫鍾意海兒嘅男士快啲追，亦同樣催谷婭㵟早日脫單。
張佳添就形容阿媽係一個好有福氣嘅人，所以就算有好多工作都唔好做得太辛苦，要享一下福。阿媽就以：「我都祝福張佳添可以盡擸啲女朋友。」令大家爆笑。周國豐就大玩食字，知道「綠色」旺阿媽，所以都祝阿媽樣樣都六六無窮，令阿媽都大讚：「讀得書多真係有用。」至於鄭衍峰祝阿媽身體健康之餘，更希望《中聲》有大豐收一年，齊齊跟住阿媽搵食。