八位大馬TVB歌手 蕭偉倫、王鄭浚仁、彭詡越、劉傳民、梁宸語、陳泓升、劉泰麟 同 陳奕伸 齊集商場，同粉絲一齊預祝農曆新年嘅來臨，佢哋亦即場跳唱充滿節日氣氛嘅全新賀年歌曲《呢個新年好緊要》。
王鄭浚仁話自己好鍾意唱賀年歌，歌單入邊有超過40首賀年歌，好開心今年多咗一首自己嘅賀年歌可以唱。梁宸語就話大馬嘅賀年歌包羅萬有，無論馬來文、廣東話、國語，甚至福建話都有，總有一首啱你聽。
好快就到農曆新年，大家都以興奮心情迎接馬年來臨，同時開心分享來年嘅新年願望，彭詡越希望新一年可以有更多機會發現自己唔同嘅才能，劉泰麟就希望打響知名度，可以有更多工作機會，以主持工作為主嘅陳奕伸話，自己最愛嘅都係唱歌，希望可以有更多唱歌方面嘅工作，而劉傳民就希望八位大馬TVB歌手可以有機會唱劇集歌。
