因為《拳霸》令香港掀起泰拳同泰國電影熱潮嘅 Tony Jaa ，當年以冇替身唔吊威吔嘅硬橋硬馬真功夫令觀眾眼前一亮，加上之後嘅續篇以及其他作品，次次都令觀眾睇到嘩嘩聲。之後佢先後中港同荷里活電影演出，好似《殺破狼》系列、《狂野時速7》，仲有《葉問外傳：張天志》同《唐人街探案3》等。
不過近日泰國媒體報道，50歲嘅Tony前年6月確診膽囊癌第3期，目前正接受治療。報道指事前Tony未有任何不適，當日因腹痛求診後，經檢查後發現癌腫瘤，之後即接受手術切除同化療治理。
此後Tony嘅癌指數一直處於正常水平，直到去年底佢曾舉行盛大嘅短期出家儀式，不過期後癌指數再次升高，Tony亦再一次開展化療療程。消息公開後，Tony Jaa嘅家人就早前傳出佢因為吸毒或感染愛滋病嘅傳聞正式澄清，指出佢大幅消瘦係因為癌症影響，而一直保密病情係因為避免外界同影迷擔憂，Tony將繼續接受治療。而近日佢仍持續於社交平台宣傳新音樂作品《One More Round》。
