鏡頭前大家睇僅僅幾秒嘅動作場面，背後可能係動作演員以性命換來，成功完成Good Take自然皆大歡喜，不過如不幸發生意外，後果就可大可小。近日台北一名特技演員拍攝劇集一場墮樓戲時，就因地面防護不足，導致佢頭部撞地，情況一度危急。
據台北市電影戲劇業職業工會於社交平台發佈影片可見，事發於1月20日，當時舞師蘇德揚正於桃園拍攝劇集一場高台拍攝向後墮下戲份，惟拋物線跌落時超出防護軟墊保護範圍，頭部即重擊地面，工作人員即時上前了解傷勢﹐影片亦隨即結束。
蘇德揚事後昏迷，急送醫院後發現有腦出血情況，留醫深切治療部7日，期間更因情況危急﹐阮方曾發出病急通知。幸搶救後脫離危險，未婚妻公開佢留醫圖片，受訪時亦指責電視台未有積極了解事件，只派出助理送上6個蘋果探病，更質疑現場未有安全人員監察，最可惡係爆出製作公司未有購買保險，事後更推卸指演員同意拍攝戲份。
原定今年與未婚妻成婚嘅蘇德揚，經醫生診斷後發現，意外造成創傷性硬腦膜下出血、腦震盪、顏面撕裂傷、面部骨折，牙齒受損、全身多處挫傷等，目前已出院休養，但未婚妻指蘇德揚仍會劇烈疼痛而驚醒。