石修 同 黃德斌 呢日現身支持著名京劇演出，劇目融合傳統戲曲表演藝術同當代劇場設計，以真功夫演繹孫悟空取經冒險前嘅章節，石修表示難得咁高水準嘅京劇在港公演，佢一知道就立刻安排時間嚟欣賞，可以學習一吓又大開眼界。
78歲嘅石修一直保養得宜成為不老傳說，呢日見佢狀態好好，近日石修將自己吹Saxophone嘅短片放上網大受歡迎，網友大讚佢型到冇得輸，又展現出強而有力嘅臂彎，真係好MAN呀，石修謙虛多謝觀眾嘅支持，仲表示大家鍾意的話佢會多啲拍呢類片同觀眾分享。
至於點樣保鮮自己呢方面，石修話其實佢同一般人一樣冇特別做乜，只係較著重做運動同保持開心，講到佢嘅樣貌近日再被指同方力申撞樣，石修就講少反問有幾多成相似呀？佢之前都同小方多次合作演父子，笑言呢個可能係啲人搵佢哋演出嘅原因。
另外，75歲嘅元秋都有現身支持，佢話同劇團嘅老友相識50幾年，一定要嚟撐場，秋姐又透露近年已進入半退休狀態，最緊要係活得開心，農曆年佢會喺香港度過，同老友以及元家班見面聚舊。
