張與辰 獲本地手錶品牌邀請，出席由佢設計嘅陀飛輪發布會以及新歌《獨居的儀式感》MV首播，除咗主角與辰之外，有份拍攝MV嘅 李芷晴 同 賴佩琳 以及品牌高層 沈慧林 都有現身。與辰更即場向早前預購陀飛輪嘅Fans親手送上腕表，同大家一齊欣賞新歌MV之餘又現場演繹新歌。
MV中與辰同「女神」李芷晴飾演甜密情侶，戴住「定情信物」腕表一同生活、一齊畫畫、更一齊揀選婚紗。可惜兩人最終分手，與辰更因未能放下舊愛而默默流下男兒淚。
與辰今次係首次挑戰喊戲，不過好快就進入狀態，導演更一take過收貨。佢事後笑言自己眼淺：「我係一個性情中人，好容易就會感動落淚，雖然同MV中因分手而落淚嘅情感唔同，但拍攝前我努力回想以前分手嘅難過往事，就自然喊咗出嚟。」
2月6號係李芷晴生日，現場驚喜收到與辰為佢準備嘅生日蛋糕，全場亦一同為佢慶祝，令芷晴非常意外。雖然今次同與辰首次合作就要飾演情侶，更有一啲相對親密鏡頭，令佢初時亦帶緊張，但因為與辰名晒友善且親和力強，兩人一拍即合，拍出甜蜜氛圍。而首次參與MV拍攝嘅賴佩琳就話非常榮幸，因為一直都非常欣賞與辰嘅表現。
