高鈞賢 以隊長身份宣佈明星籃球隊「香港星BA」 於澳門正式成立，未來會以巡迴表演賽形式走訪大灣區各個城市，透過籃球促進交流。呢日活動唔止Matthew妻女到場打氣，仲有一眾好友好似早前參加過《福祿壽訓練學院》嘅筷子基 呂熙 前香港先生 陳偉洪 樂隊 Mr. 嘅 黎澤恩（Ronny）、譚傑明（MJ） 李興華 唐嘉麟 等助陣。
隊伍中成員來自各個跨界領域，當中更包括澳門黑熊職業籃球隊現役成員，為球隊專業化同長遠發展奠定基礎。身為隊長嘅Matthew呢日亦率隊落場曬球技，狀態十足。
呢日球隊向Matthew送贈象徵責任同領軍角色嘅15號球衣，正式宣佈佢嘅隊長身份。「香港星BA」首站將前往西安作賽，其後就會到海南展開交流，標誌球隊將由港澳出發，逐步走進內地唔同城市。
Matthew妻女亦現身撐場，一歲大嘅囡囡全程黐住爸爸，為熱血體育活動增添溫馨一面。Matthew指自己12、3歲就被籃球場氣氛吸引，形容籃球係「男人的浪漫」，而影響佢極深嘅，係NBA傳奇球星Kobe Bryant嘅拼搏精神。佢仲指演藝事業低潮時，當年將大量時間投放於籃球訓練，仲因高強度操練令雙腳筋腱斷裂同接受手術，但依然未放棄籃球同演藝夢想。
佢又認為「香港星BA」唔止係明星籃球隊，更係結合娛樂、運動同音樂嘅跨界平台，希望同志同道合嘅朋友走入唔同城市，以運動推動文化交流。他亦透露，自己一向有與隊員 呂熙 及 陳偉洪一齊打籃球，彼此早有默契。
談到隊長責任，高鈞賢直言「壓力一定有」，但希望未來吸引更多真正熱愛籃球嘅藝人加入，將娛樂、運動與音樂融合，做一件有熱血、有內容、亦有影響力嘅事。