《聲秀》嘅三甲得主 馮熙燮（Ryan）、柯雨霏（Ophelia）、胡子貝（Matt），同其他成員包括穎喬（Ziva）、陸卓謙（Jeffrey）同 甄敏芳（Jenny），趁臨近新年同情人節，周末參與一個電台舉行嘅街頭音樂Busking。
六位《聲秀》年青歌手輪流獻唱，現場吸引大批樂迷同市民圍觀，氣氛相當熱鬧。Matt以《哀的美敦書》同《說謊者》為呢日表演打頭陣，緊接Ziva先後獻上《Crystal Clear》、《3AM》，之後又同Jeffrey合唱《小酒窩》，佢哋仲不忘提早向大家送上新年祝福，Jenny同Ophelia演出後更獲男迷送上鮮花，令二人非常開心。
而壓軸出場嘅Ryan分別唱出《用背脊唱情歌》、《聆聽自己的聲音》又同Jenny合唱《來夜方長》，不過佢唱到自己嘅個人歌曲《聆聽自己的聲音》中就蝦碌唔記得歌詞，好在臨危不亂順利唱完整首歌。最後六位新一代歌手大合唱《凡星》，為呢次活動畫上完美句號。
首次於港街頭表演嘅Jenny，事後仍然興奮，佢話：「室外表演感覺好唔同，街道好熱鬧，好多人願意停落嚟聽歌，氣氛非常好。」而同Ziva合唱《小酒窩》嘅Jeffrey就話：「呢首歌今日喺後台第一次夾，所以有少少壓力，但成個表演都好享受。」
Ryan事後亦解釋忘詞情況：「今朝唔記得食飯，表演時兩隻腳都有啲震，加上要兼顧主持工作，花咗太多心力介紹其他夥伴，所以影響咗表現。」佢又承諾一定會汲取教訓：「下次一定食飽再上場，唱得更好畀大家聽。」
而柯雨霏就驚訝咁多歌迷捧場：「見到咁多人好受寵若驚，能夠同觀眾咁近距離互動，又睇到咁多粉絲支持，係好開心嘅體驗。」
佢哋對即將來臨嘅農曆新年同情人節，都已有唔少安排喇，Ziva指情人節會同閨密共進「二人套餐」；Ophelia就指新年要「忍口」控制飲食，目標要減至少8公斤；而身形比前暴脹嘅Ryan，亦指會積極以新飲食法管理身材：「我呢排非常積極減肥，減肥係人生課題，本身就依靠食多啲蛋白質去減，但依家已經停滯咗，好想新年前轉生酮飲食，希望成功減到。」