鄭則仕 早前因為參加馬拉松10K賽事而成熱話，有唔少網民都好奇佢點解會突然開始跑步，對於大家嘅疑問，Kent哥就拍片解答大家。
Kent哥以「師父又救我？」作為片題，佢表示喺一年前自己雙腳喺落樓梯時就特別痛，唔可以好smooth地快速落樓梯，只可以慢慢咁、一步一步行落去。Kent哥表示由於落樓梯時實在太痛，所以佢只好去求醫，而醫生就同佢講，可以注射一種透明質酸到膝頭以舒緩痛楚，但係注射後嘅4至6個月，當藥物被吸收後就要再重新再注射。由於Kent哥唔想成世都要注射藥物，而醫生亦唔建議佢咁做，於是就教佢做一組坐立運動以作舒緩痛症，但就唔確定可唔可以徹底根治。
之後Kent哥將自己嘅情況同佢嘅師父周潤發分享，於是發哥就提議佢去跑步。起初Kent都有懷疑，覺得點解膝頭痛仲要去跑步，當時發哥就同Kent哥講應該有可能醫得好，仲反問Kent哥要唔要信，當下Kent就表示要考慮下。
期後又有一啲踢開足球嘅朋友同Kent哥講，如果膝頭痛仲去跑步，指Kent哥跑多兩日，電影《跛豪》嘅主角都可以換成佢主演。雖然意見兩極，但Kent哥經過深思熟慮後，決定相信師父發哥，從此就打開咗跑步之門，仲一跑就號咗十個月。
