處境劇《愛·回家之開心速遞》嘅一眾演員日前走入鬧巿，向巿民大派精緻利是封，現場氣氛熱鬧。鬼馬嘅單立文仲同周嘉洛一齊扮叫賣利是添！
而呢次可以走近觀眾，派禮物之餘又可以同大家合照互動，三太 樊亦敏 都覺得好開心。講到新年有咩計劃，風少 陳俊霆 就認話想趁新年假離港旅遊一下，至於 何晉樂 就覺得有假放已經好開心，因為屋企人好多，可以團聚之餘仲可以逗好多利是。
過年必做習俗唔少得係拜年𢭃利是，嘉洛就話想去阿姐汪明荃屋企拜年，令熊家各位長輩都笑佢對「屋企人」冇心，唔話去「公公」劉丹同「阿媽」 滕麗名 屋企拜笑，豹哥仲話嘉洛分咗一個排名表，令嘉洛即刻否認。丹爺就話，汪阿姐另一半羅家英睇完嘉洛同阿姐主持嘅旅遊節目後好嬲，可能會唔俾佢入門口。
許家傑 一向熱愛運動，即使過年可以休息都不忘為馬拉松賽事備戰，而大小姐 林淑敏 就話，阿Jack有個好大嘅願望，就係想跑勻全國各地舉行嘅馬拉松比賽。講到新年願望，大小姐就向 KC區瑞偉 許願，希望可以收到大大封利是！
