汪明荃 平日鍾意喺社交平台分享日常，更自創「汪阿TAG」成為佢喺網上嘅特有符號。臨近農曆新年，大家都紛紛置辦年貨為過年做足準備，阿姐都唔例外！日前佢就喺網上分享拖住買餸車仔辦年貨嘅素顏買餸Look，被網民大讚「夠貼地」！
雖然阿姐每次喺幕前亮相時都係雍容華貴，盡顯女王霸氣，不過私底下佢為人暖心親切，每逢過年都會歡迎藝人後輩上門拜年，一齊熱鬧食飯，又會親自炮製蘿蔔糕，極具儀式感。
近日亦有網民喺鬧市街頭偶遇阿姐拎住蘿蔔糕，向一位年老女小販「玉姐」送禮。從片中可見，玉姐當時整理緊檔口，聽到阿姐呼喚時回頭一望，表現驚喜。阿姐就話：「我嚟拎蘿蔔糕俾你啊！」令玉姐好開心。原來阿姐幫襯玉姐買絲襪幾十年，因而結下情誼。網民就形容阿姐唔只係熒幕上嘅巨星，仲好有善心同人情味，亦好照顧舊街坊。
