鄭秀文 黃子華 廖子妤 謝君豪 王丹妮 盧鎮業 ，以及一眾演員現身狽歲電影首映禮。Sammi即場獻唱新版《星秀傳說》，仲話宣傳工作排得密密麻麻，新年會趁機休息，不過當聽到子華神預告年廿九落區謝票，佢又即刻話要跟埋去。
子華神話當日將會現身旺角，問到佢係咪好耐冇去人多嘅地方，佢話早兩日先去逼完地鐵，仲冇被人認出。Sammi問佢係咪包到實去坐地鐵，佢就笑言自己唔似吳鎮宇咁用樂悠咭坐車，所以身份冇被發現，因為鎮宇早前用樂悠咭坐巴士時，曾被司機查核身份。
電影以盛極一時嘅日式夜總會作為題材，Sammi都分享自己曾經到夜總會演出嘅體驗，佢話當時係公司安排工作。可能自己啱啱出道，大家覺得佢似妹妹仔，所以非常友善，完全同想像中嘅夜場印象唔同。子華神聞言即爆黃霑嘅夜總會秘聞，原來霑叔曾經到夜總會做棟篤笑，點知台下男賓客完全冇反應，因為阻住人哋搵小姐，所以得出結論係男人唔好隨便去夜總會演出。
謝君豪話戲中嘅夜總會場景像真度極高，令從未踏足過日式夜總會嘅佢有幸置身其中，簡直係大開眼界。王丹妮指導演安排佢哋同媽媽生傾偈，了解夜場生態，廖子妤話對方係一位年近七十歲，喺夜場工作超過半世紀嘅女士，傾談中聽到唔少唔可以同觀眾分享嘅秘聞，包括知名人士點滴。
