下個禮拜就係農曆新年，馬來西亞經已充滿節日氣氛，而 陳山聰 林盛斌 同 梁烈唯 就為當地錦上添花，為粉絲觀眾送上舞大龍同醒獅嘅表演。其實佢哋係為有份投資、製作兼主演嘅馬來西亞賀歲電影到吉隆坡出席首映禮，又聯同戲中女主角 伍詠薇 同馬來西亞演員 馮瑋佺 一齊現身，吸引過千名粉絲及觀眾塞爆戲院。
山聰起初諗住親身上陣舞獅，但擔心搞到全身大汗，所以就轉換崗位負責打鼓，首映禮安排共13間放映廳放映，全部都座無虛席，三人更跑足全部放映廳謝票，最後就同觀眾一齊睇戲，睇吓觀眾反應，見到大家睇得開心又感動，佢哋都放下心頭大石，Bob更聲稱感動到喊。
親身感受到馬來西亞人嘅熱情，佢哋都覺得打咗支強心針，問到對票房有冇信心？山聰話：「我哋唔敢講，當然對我身為投資者或者對其他大嘅投資者嚟講，係一件好好嘅事，但係我覺得最緊要係口碑，我地每一晚各自喺酒店房度覆message覆到凌晨4、5點，全部都好正面，我哋都好感恩，都希望套戲之後有機會可以喺香港上映。」
唯唯知道觀眾由頭笑到尾，令佢非常感動，佢話：「戲中有幾個感動位，好多觀眾情緒都被牽動，唔少人都喊咗出嚟，而完場之後，好多人走嚟同我講，話好鍾意呢套戲，會喺過年嘅時候同屋企人或者朋友再去睇多一次，真係好多謝咁多位大馬嘅觀眾。」
此外，山聰自爆拍攝趣事：「有場戲為藝術犧牲㗎，其實嗰場戲都唔知要點收科，惟有咬Bob個屁股啦，但就算真係拉低佢條褲，相信佢都唔會介意嘅。」Bob即扮嬲話：「突然除我條褲同咬我屁股，都好變態﹗其實如果觀眾睇咗會笑，要我做乜都冇所謂啦。」Bob仲承諾票房好就派福利，佢會著戲中嘅兔女郎裝，喺馬來西亞商場跑一圈謝票。
電影未開賣已贏盡口碑，令佢哋考慮開拍第二部，並且著手準備，佢哋希望能為電影圈盡一份綿力，吸引更多投資者開拍電影，令更多人有工開，令電影圈可以再發光發亮。