一連四個星期嘅《中年好聲音4》70強PK戰，終於嚟到最後一星期，上一輪五燈晉級嘅蒙面歌手企鵝人，呢個星期再度強勢登場，佢演唱陳奕迅嘅《綿綿》平淡中顯唱功，會唔會再創佳績呢？
另外唐伯虎、鹿七伯同樹熊公子都喺同一集出場，樹熊公子話自己為咗今次PK戰，特別搵歌唱老師特訓，鹿七伯就聽評判建議放棄高難度，揀自己可以應付嘅歌，最後究竟邊個可以晉級40強，邊個又要淘汰除面具呢？
兩位曾經出過歌嘅參賽者 陳逸璇 同 陶枳樽 今集亦雙雙出賽，陶枳樽嘅性感舞蹈，睇得評判張佳添笑到四萬咁口。至於上一輪五燈晉級嘅幾位猛將，今個星期全部有備而來，強強對決嘅激烈程度，連添sir都話係今屆最難評，肥媽仲因為太激動喊到講唔到嘢。究竟係邊兩位參賽者PK令評判咁難抉擇。
《中年好聲音4》星期日晚 20:00 翡翠台