踏入農曆新年，唔少人氣極旺嘅圈中人都會成為大家拜年目標，頭三位人氣之星包括有年年扮財神嘅修哥胡楓、旺到大家都話要將佢封利是袋足一年嘅薛家燕，仲有一位當然係大家過年前過年後都想拜候嘅阿姐 汪明荃 啦！阿姐自家製嘅蘿蔔糕經已成為城中名物，唔少人都想品嚐此等美味，而愛錫後輩嘅阿姐，每年都會為有緣人準備蘿蔔糕。
阿姐近日就喺社交平台分享贈送蘿蔔糕同寫揮春嘅照片，相中所見，譚俊彥、梅小惠同周奕瑋等後輩，先後到阿姐工作室拎蘿蔔糕，以及阿姐親自揮毫嘅墨寶，而另一張相中，阿姐親筆寫嘅「福」字同「馬」字揮春，更多到要放於地上風乾墨水。
眾人收到阿姐精心準備嘅賀年禮品都相當開心，紛紛於社交平台晒出照片，幸運兒之一嘅周奕瑋就分享自己拜候阿姐嘅經歷，佢話：「上Liza 姐工作室攞蘿蔔糕，估唔到咁啱撞到本人，阿姐開門嗰刻係驚喜。仲得到Liza姐親筆揮春一幅，我諗緊好唔好買個畫框鑲起佢。」佢仲承諾過年時會食晒阿姐嘅蘿蔔糕同XO醬。
