糖妹、 林奕匡、 Moon Tang 同 徐偉賢 現身一個青少年街頭音樂表演擴展計劃嘅結業禮，齊齊擔任表演嘉賓兼分享創作音樂心得。糖妹連續三屆為計劃擔任導師，佢好開心見證學員成長：「上一堂學嘅嘢，下次 Busking 就會用返出嚟，見佢哋咁用心，作為導師都想盡量教多啲。」
糖妹指以前冇咁多機會，因為當年唔興放首歌上網就有人聽，佢話：「我記得嗰時去商台返暑期工，見到農夫行過，就好大膽問佢哋公司簽唔簽新人。因為當時真係好渴望唱歌，決心把握每個機會。」
以短裙現身嘅Moon Tang，被問到點樣面對創作過程嘅困難，她笑言「有困難嗰陣，我就會放低唔做，去做唔關音樂事嘅嘢，之後返嚟就會做到㗎啦。」Moon Tang 大讚學員表現出色，令佢相當驚喜。
壓軸出場嘅Phil就話踏上音樂呢條路唔容易：「相信自己鍾意嘅嘢係啱就得，人哋講咩、有冇成績都唔緊要。我哋玩音樂，自己鍾意就得，自己鍾意就開心，開心最緊要。」視張學友為第一個偶像嘅Phil，感恩自己音樂路有很多伯樂：「監製 Edward Chan真係鞭策我好多。以前我好好勝，乜都要第一、要攞獎，做歌手就要學習耐性同勇敢接受批評，監製唔會害你，唔好一聽人批評就反抗咗先。」
