仲有幾日就係農曆新年，講到新年嘅習俗，張馳豪 Aska 就表示除夕會與家人食團年飯，屆時必定會食湯圓，取「團團圓圓」好意頭。不過今個農曆新年，Aska表示為咗保持辛苦練嚟嘅一身肌肉，今年只畀自己食一粒湯圓淺嚐一下，算係攞個意頭意思意思，佢仲話自己係花生味嘅擁躉：「因為香味濃郁，冇芝麻咁甜。」
問到今個情人節會點過？Aska就大耍太極：「有情人就同情人過，冇情人就同自己過。」佢又指喺意識形態上自己需要想像有一位情人，以作為自己持續投入工作嘅精神動力。Aska表示元宵前夕將出席活動與fans度佳節，佢透露屆時自己嘅新歌應該已上線，笑言到時新歌就係自己嘅情人。
今個農曆新年選擇於工作中度過嘅Aska，笑言可以避開假期外遊嘅人潮，至於會否想趁新年發一筆「新年財」？佢就話自己冇賭運，所以唔會參與賭博活動。
