現年71歲、有「鬼馬歌后」之稱嘅朱咪咪，雖然減少咗喺螢幕上嘅演出，但佢不時會接登台騷，日前咪咪姐就經香港轉機到美國登台。
現時定居於新加坡嘅咪咪姐，難得途經香港，加上好友相約，於是佢呢晚就與 順嫂梁葆貞、余慕蓮、吳麗珠 等一眾甘草老友飯聚。資深傳媒人 汪曼玲 上載當晚飯聚照到社交平台，佢喺帖文中寫道：「朱咪咪由星加坡經香港飛去美國登台唱歌。應蔡彪夫婦之邀飲茶，約埋順嫂、余毛及吳麗珠一齊敍吓舊，結果珠女埋單。原來順嫂與余毛都係1937年出生，相識七十幾年，現在更是麻將腳，經常小賭移情，消磨時間。」
相片上載後，唔少網民都指以往身形圓潤嘅朱咪咪消瘦咗唔少，加上相中佢未施粉黛，少咗分明媚，令網民紛紛留言表示擔心其健康狀況。其實咪咪姐上月返港為黑妹慶祝生日時，就已經有網民指佢身形暴瘦，當時咪咪姐曾於訪問中，解釋暴瘦原因係源於飲食習慣變更，而家少食多餐，所以瘦咗十幾磅，佢仲話自己每年都有定期檢查，健康狀況良好。
