過年行花市對大部分香港人來講係過年嘅一部分，但係明星藝人行花市難度就似乎高咗啲，所以校長 譚詠麟 已經有超過20年冇行過花市喇！不過踏入馬年之際，校長就帶上一班明星足球隊嘅老友勇闖香港最大嘅年宵市場—維園。
輕裝上陣嘅校長，對食嘢嘅興趣似乎大過買花，一踩入年宵市場就直闖小食檔，見到檔主即刻祝福對方「生意興隆」，難怪檔主咁好招呼，俾校長嘅牛雜同埋魚蛋都特別大兜啦！
校長似乎對牛肚特別有興趣，拮完一嚿又一嚿，而檔主都好識做生意，不停攞啲好嘢出來招呼校長一行人，校長亦都好識做，叫晒所有兄弟齊齊來張大合照，有校長呢個生招牌，相信檔主今年一定可以賺到盆滿鉢滿！
