Twins一連兩場見面會2月13日舉行頭場，呢次亦係孖女出道25年以嚟首個大型Fans Meeting，場內亦展出八套歷年嚟佢哋經典舞台服裝同頭飾，令Fans可以近距離瘋狂打卡，非常有心思。佢哋嘅經理人霍汶希都有到場支持。而湯怡（Kathy）亦神秘現身，送上祝賀Twins成軍25周年嘅蛋糕。
見面會由Twins好友「農夫」擔任MC，孖女除咗唱出準備好嘅幾首歌，又接受粉絲點歌。令大家最開心嘅係，孖女同大家玩遊戲，又抽出互動福利，仲有唔同組合嘅合照同全場大合照。
眨下眼Twins已經出道25年，二人睇返成長片段時都話好多回憶，尤其係睇到頒獎禮嘅畫面，孖女都大讚粉絲敲鑼打鼓式嘅應援令佢哋好有面子，而全場粉絲聽到呢句亦即刻自動波吹BB，全場好有默契嗌「阿嬌」、「阿Sa」，氣氛即時升溫。 阿Sa表示非常鍾意以呢種形式同大家見面，仲趁機叫大家搵返當年嘅熱情：「要保持個初心㗎嘛！好似我哋咁！要保持個能耐、保持個精神。雖然你哋個年紀、我哋都係啦，大家越嚟越大，但係都唔可以『老兀兀』咁樣㗎嘛，我喺台度都唔會嗚⋯⋯ 咁㗎嘛。」
佢仲分析可能冇電話，大家先可以投入，然後又問：「可唔可以變返以前呀？」全場即時大叫不停，阿Sa最後話：「嗱，以後記住我哋去到邊度都要咁呀，勿忘初心呀。」
臨完場前，二人分享感受，阿嬌多謝大家25年不離不棄支持，雖然唔係成日見面，但孖女都會掛住大家，希望以後搞多啲見面活動。阿嬌又自爆有社恐，太接近人會緊張：「但係今日我冇，呢個場地真係好warm，我今日完全冇怯場、冇緊張、非常好。」阿Sa坦言出場前好緊張：「可能係好耐冇見，亦都可能係咁樣嘅形式嘅fans meeting真係第一次。平時開演唱會，你哋係好遠，但呢度大家係好close，所以可能因為係咁樣就有少少緊張，所以好多謝大家今日嚟到呢度同我哋一齊玩。」
