曾展望 葉蒨文 現身一個活動，同一眾粉絲提前過情人節，Sophie仲拋花球俾幸運兒，現場非常熱鬧。今個情人節話曬都係小倆口拍拖後第一次過嘅情人節，所以兩人都好認真對待。
Sophie透露，佢送咗耳機俾GM，自己都有同款嘅同GM嘅湊成一對。不過佢知GM比較實際，所以都會送實用物品，希望可以陪佢成長。GM就話準備咗兩樣嘢俾Sophie，第一樣係情侶鞋，寓意可以一齊行呢段路。Sophie自認有儀式感，但GM並唔係，所以GM送情侶鞋同自己情侶裝都令佢好驚喜。
有「金牌媒人」稱號嘅 林盛斌 早前拍心口話要介紹男仔俾陳庭欣，而佢已經開始行動。阿Bob話自己有問身邊嘅男仔朋友有冇興趣同Toby認識，之後先互相send相，仲話Toby唯一開嘅要求係身高相若，並無要求對方有幾多身家。阿Bob仲話，最近工作忙碌，過年後會計劃搞返個細Party令雙方有個見面機會。
許紹雄囡囡 許惠菁 日前宣佈加盟阿Bob旗下公司，阿Bob就話，自己一直有睇Charmaine嘅網上頻道，認為Charmaine形象清新，做主持會好有趣。之後二人傾偈，得悉Charmaine有意向主持方向發展，所以阿Bob就提出合作邀請。
