資深歌手 張德蘭 最近忙住農曆新年打點家中大小事，仲要積極籌備舉行個人演唱會，今次亦係佢首次登上紅館開個唱。為咗令樂迷更了解佢嘅近況，張德蘭最近開拓社交媒體，身為中醫嘅佢，又分享調理秘方。
張德蘭多年來除咗容貎保養得宜，佢同老公 楊偉誠 嘅感情更係恩愛不減，37年夫妻生活仍然甜蜜如初，張德蘭話：「幸福婚姻基於彼此嘅愛同理解，相處最重要係大家開心，真愛係萬能。」
原來夫妻兩人喺每年情人節，都會去到相識嘅餐廳慶祝，張德蘭仲自爆一次最特別嘅情人節，佢笑說：「原本應該好浪漫，但我因為飲得太多香檳，不知不覺開始醉，就不停開心大笑，連老公都好少見我呢個樣，後來醉到唔識笑，因為瞓著咗，真係幾尷尬。所以以後我都好乖，香檳都係淺嘗好，唔好當果汁飲得咁瘋狂。」楊偉誠笑言：「我話畀大家知，飲醉嘅人原來好重！」
即使忙於籌備開騷，張德蘭仍然一如以往布置家居，佢覺得春節對中國人嚟講意義重大，尤其係對已婚夫妻嚟講，係忙碌而充滿喜悅嘅時候。開騷在即，張德蘭都話要修身，不過賀年嘅美食當前，佢都笑言難以忍口，唯有食完先減。
