鍾欣潼 同 蔡卓妍 為咗慶祝Twins成軍25週年，舉行兩場粉絲見面會，情人節舉行第二場，Twins喺中午12點同粉絲玩到差不多傍晚6點先結束，台上台下打成一遍，喺encore環節，情緒高漲嘅Twins更為大家清唱足足12首歌。
Twins講到以往粉絲聚會多數係BBQ或者喺酒店舉行，阿Sa話：「比較係細啲嘅場地搞，有production真係第一次。」農夫即問：「平時係咁多人一齊BBQ㗎？」阿Sa話係好多人，點知阿嬌大唱反調兼放笑蛋：「都好多人唔應約㗎！冇嚟嘅舉手！」
當農夫問到一對組合點樣可以維持25年？台下fans即刻搶答：「因為有我哋！」阿Sa忍不住笑指：「咁我哋都要靠自己嘅，雖然都係有你哋。」阿嬌認同話：「事半功倍啦，雙贏。」至於相處之道，阿Sa指佢哋好幸運，因為佢哋都係「溫和派」，而且兩人真係未試過有好大嘅衝突要嗌交。阿嬌補充指有時會為工作有意見分歧，阿Sa話：「可能因為我哋都好Hea。」阿嬌抵死話和應話：「鬧交好攰㗎知唔知呀？」
見面會嘅讀留言牆環節，有fans寫到「你哋唔好咁早退休呀。」Sa斬釘截鐵話「冇咁嘅打算！」，而全日最感人係播放25周年影片後，台下fans即場重現當年頒獎禮嗌嘅應援口號加埋打節奏，全場整齊高聲大嗌二人名字，隨住《相愛25年》音樂響起，阿Sa、阿嬌忍唔住爆喊：「以前每次出席頒獎禮，你哋都嗌到我哋聽唔到自己唱乜嘢歌，全場最大聲就係你哋！所有回憶返晒嚟。」場面勁催淚。
