日本不老男神 福山雅治 唱得又演得，近日仲做埋導演，執導音樂電影，日前佢現身戲院舉行新戲試映會，電影取材自福山喺家鄉長崎舉行嘅演唱會，當日嘅演唱會場面墟冚，但原來佢未紅時曾經為其他演唱會暖場，而且主角仲係知名卡通人物麵包超人。
現場有位粉絲提及當年喺麵包超人活動上見到福山，福山大爆當時為麵包超人暖場，但因為時間問題，被要求縮減表演內容，不過福山都好感謝有嗰段經歷，先可以成就今時今日嘅自己。
福山2月6號啱啱過咗57歲生日，出道接近40年，佢嘅凍齡外貌一直令人讚嘆，除咗先天條件，後天嘅努力福山一樣冇偷懶。福山透露自己好注重睡眠品質，飲食清淡，而且會固定去健身室做重量訓練，唔怪得可以keep得咁好啦！