鍾嘉欣 日前先喺社交平台趁情人節同老公拍拖去海邊曬恩愛，兩公婆緊緊相擁，喺斜陽映照加上兩人嘅甜蜜笑容，結婚11年依舊甜蜜如初。
嘉欣同Jeremy婚後育有兩女一子，一家五口不時公開生活小片段，嘉欣雖然不時返港工作，不過當返到溫哥華時就會抽盡所有時間陪伴小朋友，好似近日就有當地朋友發現，嘉欣於當地華人社區非常興旺嘅商場中，一個糖果年貨攤檔出現。
該網友現場目擊，見到嘉欣一直面帶微笑，吸引唔少顧客光顧，面對合照要求更係來者不拒，不過現場圖片所見嘅小朋友，就似係品牌創辦人兄妹，似乎嘉欣係為支持當地年輕朋友品牌嘅業務喇。
