張振朗 劉穎鏇 羅天宇 丁子朗 冼靖峰 等仲有聲秀三甲，呢日喺銅鑼灣鬧市攬住TVBuddy一齊為《馬到功成萬象新2026蓉港新春晚會》拍攝賀年歌曲，一眾藝人紅噹噹喺街頭大受歡迎，對集郵粉絲來者不拒。
振朗仲分享咗兒時親身經歷，記得細個新年會著新衫，但因為屋企人唔會買七套新衫俾自己，所以年初一到年初七都會著住同一套新衫去拜年，直至大個仔先改變呢個習慣。而Tiffany新年則會行花巿應節，感受熱鬧氣氛。
阮浩棕 同 潘靜文 新年都會同家人度過，不過今年嘅感覺就有啲唔同，阮浩棕因為同汪明荃合作節目，有幸被邀到阿姐家中拜年，品嚐阿姐嘅糕點同廚藝。而Sherman今年有份參與開運節目，過年期間會喺電視見到自己嘅演出。
Archie每逢大連初一都會去婆婆同嫲嫲屋企，然後就會發個新年財，打通宵麻雀，因為年初一小賭贏錢就意味住成年都行好運。丁子朗笑言自己一個人住，係獨居老人，所以佢同羅天宇都期待去Archie屋企拜年逗利是。
而馮熙燮、胡子貝同柯雨霏好開心可以參與拍攝，Ryan好多時因為工作陪唔到屋企人，所以初一、初二會預留俾屋企人，而胡子貝就期待逗利是，柯雨霏就會同家人食湯丸度歲。