歡哥黃子華喺年廿九呢日，聯同導演吳煒倫以及一眾新戲拍檔廖子妤、楊偉倫等到旺角一間戲院出席宣傳活動，兼大派利是同笑口棗，預先同影迷拜個早年，現場真係好似年宵市場咁熱鬧。
電影未正式上畫，已經傳嚟好消息，就係電影優先場已經獲得好好嘅成績，令團隊相當振奮。呢日以歡哥造型現身嘅子華，笑稱話本身諗住著件底衫出嚟，但係見大家都咁認真，所以子華都唔敢太過Hea，決定要比大家睇下正宗地道旺角歡哥嘅風采。至於問到佢幾時可以約到V姐鄭秀文一齊出嚟？子華就話本來今日約咗V姐，但係見V姐呢排好頻撲，所以叫咗佢喺屋企食多啖越南粉，補充吓精力。不過，子華就話而家好頭痕，諗緊如果票房好嘅話，要派啲咩福利比影迷呀。
子華唔單止落力宣傳賀歲電影，原來佢仲好有條件成為旺角嘅推廣大使，子華話：「旺角真係好多嘢做，買閃咭又有啦，波鞋街又改晒啦，總之我勸全世界嘅人得閒就嚟旺角，留港消費。」不過，問到佢會點樣現身旺角以避途人耳目？佢就話一定唔會話比大家知，佢只係講笑話會笠棉胎落去喎。
