TVB處境劇《愛‧回家之開心速遞》嘅錄影廠每逢新年都特別喜慶，唔經唔覺呢個大家庭今年已經係第九年陪住觀眾過年，呢日 劉丹 就率領熊家 滕麗名 呂慧儀 單立文 周嘉洛 等一齊拍攝新年嘅戲份，又唱賀年歌又派利是，真係好應節。丹爺同豹哥覺得快樂不知時日過，轉眼間已經第9年。
拍攝當日係阿滕踏入50歲生日，全廠人都為佢慶祝，特別係阿仔周嘉洛更連環送上愛心之吻考順阿媽，令阿媽好鬼冧。阿滕話生日最有義意就係返工，唔單只食咗好多個蛋糕，幾乎擘大個口想要乜就有乜，又收穫眾人嘅祝福，當湯盈盈祝阿滕40歲生日快樂時，阿滕就笑稱已經搞咗60大壽，並許下生日願望身體健康，拍愛回家拍到自己60歲。
無論現實同劇中，丹爺嘅輩分一定係最高，所以每逢農曆新年丹爺嘅紅包都準備充足，佢覺得能夠大派利是係一種福氣，希望長派長有，意味住佢搵到又受歡迎。而豹哥就憶起公司揚言加人工，所以利是可以加碼，多謝公司。