女星精心打扮賀新年 海兒變上海美人兩代玉女合體

新年著新衫扮靚靚就至醒神喇，圈中唔少女星都以一身華麗打扮出post賀新年，好似因擔任《中年好聲音》評審為大眾熟悉嘅 海兒 ，就喺社交平台分享一身旗袍造型，貼身剪裁盡顯佢唔科學嘅好身材，加上佢手執古舊煙斗，於擺滿老式擺設嘅場景拍攝，加埋高衩剪裁大騷美腿，甚有夜上海美人感覺。

而 郭柏姸 就以一身露背打扮力抗溫暖嘅新春，盡顯青春氣息之餘，亦擺脫竿竿嘅可愛形象，馬年向略帶成熟風嘅風格進發。至於參加《聲夢傳奇2》出道嘅 劉芷君 轉眼18歲大個女，日前佢現身為新春節目錄影，Aster就以一身新式春節打扮現身，小短裙展示長腿，又同合作嘅 關嘉敏 宋宛穎 王嘉慧 同 曾文心 齊齊合照，眾美喜慶迎新年。

至於蛇年成績突出，作品一部接一部嘅 張曦雯 ，好快新作《臥底女團》下星期一就同大家見面，Kelly就決定趁新春到慈山寺好好沉澱，早前回復單身嘅佢仲特意於桃花下行幾圈增強桃花運。一向愛動物嘅Kelly，仲抱全初生可愛貓仔合照，更封利是比小可愛祝佢快高長大。

今年兩大玉女 周慧敏 同 梁詠琪 齊齊應邀參與央視新春晚會，與 薛凱琪 張鈞甯 同其他女星共同演出，事後Vivian仲公開同Gigi嘅罕有合照，兩代女神合體非常難得。