謝霆鋒近日忙住為新戲喺成都做宣傳，加上佢嚟緊喺深圳舉行演唱會，再次掀起鋒潮。近日有網民喺社交平台貼出一條AI影片，見「霆鋒」變身做經典動畫角色美少女戰士，唔少網民覺得霆鋒嘅靚仔樣，完全carry得住月野兔水手服造型，毫無違和感，仲希望推畀本尊睇！
網民上載嘅AI影片以「這是我們認識的謝霆鋒嗎？」為題，見「霆鋒」企喺塊鏡前，搖身一變成為「Sailor fung」，回眸一笑，帶點尷尬咁掩住嘴。
網民紛紛留言「謝霆鋒真係我見過靚仔界最kam嘅人...連呢啲ai片，我都覺得佢真係做得出」、「佢自己變身後都忍唔住笑」、「天呀～我笑噴了」等，另有網民仲話「麻煩你send謝霆鋒睇」，更有網民笑稱係「美少女戰士之少年激鬥篇」，當年霆鋒拍《新古惑仔之少年激鬥篇》話題作，年僅17歲嘅霆鋒首登大銀幕拍三級片，飾演主角陳浩南，因唔夠秤入場睇首映，一度成為新聞人物。
查實霆鋒與好兄弟陳奕迅（Eason）曾於1999年曾反串扮日本女團PUFFY，二人鬼馬造型令人難忘，唔怪之得今次呢個AI造型，許多網民都期待本尊出馬啦！
