香港賽馬運動深植社區，廣受市民歡迎，喺全球更處於領先地位，於國際舞台屢創佳績，為咗迎接別具意義嘅馬年，馬會特別推出一系列橫跨全年嘅活動，弘揚人馬合一精神，與香港市民同樂。年初三賽馬日，「馬年大使」郭富城就現身馬場，為當代藝術家馬興文嘅「融馬」雙駿藝術雕像揭幕。身為馬主嘅城城，除咗為大家送上新年祝賀，亦期許自己嘅愛駒新一年可以跑出好成績。
城城今年過年登上內地春晚舞台，成為全晚最高收視，太太同三個寶貝囡囡當然都有睇爸爸嘅精彩演出，不過喺大女同二女心目中想追嘅星原來另有其人，就係韓國大勢女團BABYMONSTER。
城城嘅朋友因為知道囡囡鍾意BABYMONSTER，特別送上團員親筆簽名CD，兩位千金收到之後愛不釋手。而城城嘅排舞老師都有幫BABYMONSTER排舞，所以城城話嚟緊如果有機會，都會帶阿女去美國體驗下正式嘅舞蹈課程。
城城每次講起囡囡就慈父上身，尤其八歲嘅大女越來越成熟，好有大家姐嘅風範，令城城相當安慰，兩個家姐日日放學返屋企第一件事就去去抱妹妹，三姐妹非常有愛。
