講到農曆新年，馬來西亞一定係其中一個最有氣氛嘅地方，八位大馬TVB歌手王鄭浚仁、劉傳民、劉泰麟、陳泓升、陳亦伸、蕭偉倫、梁宸語同彭詡越，就趁著新年帶大家去著名嘅景點鬼仔巷，感受一下大馬式新年。
唔講唔知，大馬分分鐘係number one嘅賀年歌出產地，每年都有過百首原創新年歌，八位大馬TVB歌手今年都推出一首《呢個新年好緊要》，佢哋仲即場喺鬼仔巷跳唱賀年歌，非常熱鬧。
而主持 王鎮泉 更帶隊去拜訪移居當地務農嘅資深前輩 燦哥 廖偉雄 。燦哥除咗派利是、請食飯，仲傾囊相授，分享自己加入演藝圈接近五十年嘅心得，令一眾後輩獲益良多。至於有冇機會再出山，燦哥亦不改幽默本色有一番妙答。
