今個新年，多位 TVB 藝人到馬來西亞出席當地活動，感受當地濃厚嘅過年氣氛。馬來西亞 TVB 藝人 王鄭浚仁Rax 與 彭詡越Xair 更充當「地頭蛇」，帶同 陳煒、朱敏瀚、劉穎鏇與姚子羚親身體驗別具特色嘅大馬新春氛圍。
入鄉隨俗，Rax 與 Xair 即場教四位藝人用馬來文同大家拜年，齊聲說出「Selamat Tahun Baru Cina」 (新年快樂)，四人迅速掌握發音，語言天分獲全場掌聲。之後佢哋又挑戰以閩南語講吉祥賀語，當中以姚子羚講嘅閩南語最為標準。
Rax 與 Xair 分享大馬農曆新年必備傳統儀式「撈生」，並會高喊寓意好意頭嘅「興、旺、發」字眼，象徵來年步步高升。眾人體驗撈生後，就與主持 王鎮泉 暢談新年計劃，陳煒表示過年期間除咗照顧丈夫同家中長輩外，佢亦會親自下廚準備團年飯。
姚子羚就表示自己超愛蘭花，所以過年前必定會親自去揀蘭花，有時亦會添置桃花為屋企增添喜氣，子羚話試過喺露台種桃花，點知引嚟大量蜜蜂，朱敏瀚聞言即笑謂：「我仲以為係追求者！」主持隨即打趣問子羚今年是要唔要「狂蜂浪蝶」？佢就幽默表示如果係有素質嘅狂蜂浪蝶，自己唔會介意。
朱敏瀚話自己嘅新年活動就係逗利是，至於問到拜年時會唔會畀親戚追問拍劇八卦同緋聞？朱仔同劉穎鏇都話家人相當開明，唔會刻意提及。
