朱晨麗與趙璧渝（Osanna）早前為一間學院擔任客席講師，與數十位莘莘學子分享演藝生涯，談及初入行時種種困難及挑戰，港姐冠軍出身嘅朱晨麗簽經理人合約，而訓練班出身嘅趙璧渝就冇經理人，二人都分享有經理人與冇經理人嘅好與壞。
朱晨麗透過參選港姐入行，笑言參選係因為「冇錢」：「參選時候，語言係最大挑戰，當時有勇氣站上台，係因為要『食飯』，知道唔嘗試就一定失敗。當時唔太熟悉娛樂圈，連擺Pose都唔識，但好感恩，過程中有好多本地女仔幫助我，又幫我惡補廣東話，我同佢哋關係都keep到而家。其實選美時，屋企人話有泳裝環節，佢哋叫過我唔好參加，不過我努力克服。」趙璧渝聞言表示好佩服對方勇氣：「自己冇選美嘅勇氣，性格承受唔到咁大壓力，但又鍾意演戲，咁啱見到訓練班招生，於是就去試。」
近日重播TVB經典劇《名媛望族》，朱晨麗喺劇中飾演鍾家媳婦季小由，跟鍾啟燊及「金木水」吳卓羲展開糾纏不清嘅三角戀，佢提到初入行，朱晨麗當時連鏡頭喺邊都唔知，更曾擋住吳卓羲鏡頭，鬧出笑話。朱晨麗認為最大挑戰係面對外界評擊及輿論壓力：「當時只識喊，不知喊咗幾耐。」朱晨麗覺得喊係冇用，要內心變得強壯、調節心態，接受唔到就唔好睇啲評論。
趙璧渝初入行最大困難莫過於是經濟問題：「訓練班畢業後人工好少，好難捱，得幾千蚊月薪，所以要搵其他兼職去支持生活。」趙璧渝認為做藝人要持續畀新鮮感觀眾，屬於大挑戰，同埋而家流行AI短劇，全部演員都係AI，真係好擔心取代真人演出，有諗過或許到時唔需要真人演戲，已經可以出一套劇。
朱晨麗就指作為藝人最大恐懼係冇工作，曝光率不足，擔心逐漸被觀眾遺忘，更表示會順應趨勢，轉型經營社交媒體。講座後，朱晨麗與趙𤩹渝開心見到學生反應踴躍，二人異口同聲表示分享期間勾起不少往事，朱晨麗直言唔會忘記初心，努力做好每件事，進軍網絡世界之餘，亦跟隨時代同步改變，同時堅持演員身份。趙璧渝入行至今13年，仍想喺演藝路上馳騁，目前除咗做演員，同時會兼職教瑜伽及頌缽治療師：「我以前唔擅長做分享，但人生經歷多咗，我唔介意同新一代交流心路歷程。如果年輕時，有人同我分享類似經驗，我可能唔使行冤枉路。」
