陳庭欣舊年年尾宣布同男友分手，踏上馬年當然要去求下姻緣啦，之前喺《萬千星輝頒獎典禮2025》上，曾揚言會努力幫Toby脫單嘅金牌媒人阿Bob林盛斌，日前就帶Toby以及主持潘盈慧一齊去求姻緣，希望馬年覓得良緣，兩位女士喺堂主郭玥彤Celia嘅幫助下，誠心向神明許願。
阿Bob話其實佢早就察覺Toby同男友有分手跡象，所以佢未等Toby親口講，已經feel到Toby 有啲唔妥。Toby話記得喺台慶慶功時，咁啱撞到阿Bob，兩人寒喧期間，Toby就講咗一句「阿Bob其實呢……」話口未完，阿Bob竟然回應一句「唔係真㗎嘛」，阿Bob嘅反應，令Toby又驚又感動，講講吓Toby仲忍唔住眼濕濕，話估唔到阿Bob咁細心。
阿Bob揚言全年招呼Toby，就叫Toby數三樣做女友嘅優點同缺點，優點方面，Toby就話自己好細心，一啲特別嘅日子，一定會留畀對方，仲有自己都係一個好獨立嘅女仔，可以自己照顧自己。至於難頂嘅部分，Toby話自己會過份緊張、遇到不公義嘅事一定會提出，仲有偏食嘅習慣。
之前一直有傳Toby嘅舊愛有十億身家，Toby亦因而被封「十億女友」，呢日阿Bob就問Toby 呢樣嘢會唔會成為佢結識新歡嘅絆腳石？Toby強調佢一直都解釋無十億，但係大家都無當一回事，然後網民又信以為真，令佢好無奈。
至於家庭事業兩得意嘅阿Bob，呢日亦自爆太太並非佢嘅初戀女友，仲話自己經歷過十次八次嘅戀愛經歷，阿Bob豐富嘅戀愛經歷，就令阿盈嚇一嚇，場面搞笑。除咗感情方面之外，阿Bob同Toby都有分享佢哋馬年嘅目標。
