陳凱詠Jace初二、初三喺紅館舉行兩場演唱會，嚟到尾場，唔少圈中朋友有嚟捧場，好似周嘉洛、馬天佑，就連啱啱做完手術嘅釗鋒撐住拐仗嚟捧場，真係好有心啊﹗新正頭，當然唔少得𢭃利是啦，呢晚唔少觀眾向Jace大派利是，邊唱邊有利是收，台上台下都喜氣洋洋呀。
呢晚Jace就請嚟林家謙做嘉賓，家謙更向Jace送上三張手寫揮春當禮物，而其中一張「你太努力」嘅揮春，就引爆阿Jace嘅淚點呀，家謙話覺得Jace比人付出更大嘅努力先行到呢步，佢希望對方可以為自己感到自豪，家謙呢番說話令Jace相當感動，佢話自己都有反思，係咪自己做嘅嘢太多？太大想頭？太硬頸？太有自信？佢話呢啲問題，自己諗好耐都仲揾到答案。家謙除咗勉勵Jace之外，佢更送上Twins嘅賀年歌《你最紅》，令全場氣氛高漲。
雖然呢次Jace嘅演唱會被指入座率未如理想，但係Jace都好感恩呢兩晚嚟支持佢嘅家人、朋友、粉絲、當然唔少得嚟做佢嘉賓嘅兒時偶像陳慧琳啦，不過，Kelly得悉Jace幼稚園時已聽佢嘅歌時，佢話心情真係百感交集，認真搞笑。
