轉眼出道11年嘅 黃淑蔓（Feanna）出道11年，日前於西九文化區自由空間「大盒」﹐舉行生涯首個個人音樂會，開騷當日係農曆年廿八，入場歌迷都獲贈「碌柚葉」應節。
Feanna除咗獲家人拉隊支持外，好友 陳健安、Nowhere Boys成員Van同Ken、以及過往歌曲嘅製作成員、以及圈中唔少好友都有現身捧場，見證身為唱片公司孻女嘅Feanna呢次重要音樂歷程。
Feanna以《猜猜我是誰？》揭開音樂會序幕，歌單中除咗自己作品外，亦演唱咗林憶蓮、陳奕迅、方大同同薛凱琪等前輩嘅作品以及唔少外語歌曲，當佢演唱新歌《喵！》時，全場更驚喜高舉貓形手幅，令事前唔知情嘅佢非常驚喜。
期間Feanna演唱近日上映嘅電影《再見UFO》主題曲《華富一號》時話：「大家都知我係因為11年前唱《差一點我們會飛》，得到金像獎『最佳原創電影歌曲』入行，事隔11年，今年我再次入圍，呢首歌係我7年前錄，我仲未去英國讀書、18歲嘅時候錄，希望大家多多支持。」
呢晚Feanna選擇以出道作《差一點我們會飛》作壓軸歌曲，電影導演陳心瑤亦與全場歌迷一同高舉寫上「We grow with you」手幅，令Feanna感動到眼濕濕。完騷後歌迷大叫encore，佢亦再次出場演唱《I am All Alone》，為音樂會畫上句號。
Feanna完騷後情緒仍然高漲：「我依家心情緊張又開心，好似發緊夢，非常感恩，好開心，形容唔到，第一次有呢個感覺！」音樂會上佢以結他自彈自唱，事前仲請教唔少前輩，仲話打算買結他：「大家幾喜歡我彈電結他，咁就繼續學落去，將來可以出多啲band sound嘅歌。其實我仲有好多嘢想試，例如跳唱、Rap。」
佢又話台上見到歌迷揮動手幅時非常感動，但為保持靚妝同繼續唱歌而強忍眼淚。而歌單部份就係同同事相討下嘅精心成果：「唱我嘅作品同好欣賞嘅歌手作品、仲有由細到大影響我好深嘅歌。我好鍾意學習唔同語言，因為同一個意思有好多種表達，所以揀咗不同語言嘅歌送畀大家。」