由《毒舌大狀》原班人馬包括導演 吳煒倫 ，黃子華、加上 鄭秀文 主演 王丹妮 廖子妤 楊偉倫 盧鎮業 何啟華 楊偲泳 譚旻萱 李芯駖 林熙彤 鄧麗英 謝君豪 等演出嘅賀歲電影《夜王》，大年初一正式上畫後，截至2月21日(大年初五)晚，票房已衝破4000萬港元，入場人次更突破50萬，《夜王》唔止播放場次破近十年賀歲片紀錄，更成為香港史上賀歲電影開畫票房第一、亦係香港史上賀歲電影單日票房第一名，認真犀利。
除香港之外，《夜王》亦陸續於世界各地上映，於馬來西亞、美國、加拿大、英國、愛爾蘭同荷蘭等歐洲城市分別上映。
主演嘅Sammi過年前馬不停蹄完成一連串宣傳後，新年假期已同家人一齊入戲院捧V姐場，佢仲喺社交平台分享：「由開拍到前陣子瘋狂式緊密宣傳工作，一切一切記憶猶在。一步一腳印。點滴在心頭。歡哥V姐跟東日的仝人（包括太子峰）衷心多謝每一位的入埸。這部電影是我們的共同結晶品。才公映兩天，路仍漫長，繼續一步一腳印。」
而已三度同子華合作嘅Fish亦一樣開心：「之前謝票感受到觀眾嘅喜愛，甚至期待能夠拍續集，或者原班人馬再創作一個新故事。其實《夜王》呢部電影有笑有淚之外，更帶出香港人遇到挫折會堅毅求新求變嘅精神。希望電影能夠為馬年帶出一個好念頭、好開始，再創佳績！」
《夜王》中亦有唔少新面孔，片中一班EJ Girls樣貌身材皆出眾，令人眼前一亮。當中飾演葵芳嘅舞台劇演員 蔡蕙琪 更令觀眾留下深刻印象，佢面對子華同阿卵時互相擦出火花。Kay得知外界讚賞時話：「好感恩呢個角色成為我小小里程碑。電影有好票房，希望《夜王》繼續瘋狂刷新紀錄！」
