關智斌 大年初一先同容祖兒、Twins仲有經理人 霍汶希 相聚，而大年初五Kenny已到澳門開工，舉行演唱會澳門站演出。Kenny繼續Show Off Flying Pole大展身手，更同歌迷真情對話，又宣布正式成立官方粉絲後援會。
演唱會一開始就播出去年Kenny於啟德舉行演唱會嘅片段，完show後觀眾不停大叫Encore唔肯離場，但由於場地時間所限，Kenny只能唱兩句《眼紅館》。而今次澳門演出，佢就特意揀選《眼紅館》作開場歌曲：「上次演唱會因為時間關係，令我2025年留下遺憾，所以我覺得2026年我第一時間一定要唱返呢隻《眼紅館》俾大家聽，希望你哋會鍾意。」
Kenny完成Flying Pole環節後又講到，籌備演唱會時，腦海早已出現Flying Pole表現嘅無力感同失重感覺。可惜去年啟德因場地關係無法表現，今次終於可以完整呈現。佢仲還感性話：「我發現無論呢個世界幾黑暗都好，只要一抬頭始終會有一啲好微弱、好溫暖嘅光去守護住你哋。」
Kenny邀請同門師妹女團VIVA擔任澳門站嘉賓，又一齊合唱《相對濕度》，之後VIVA為觀眾表演《FOMO》。Kenny仲指VIVI係首次為演唱會擔任嘉賓：「我突然間覺得，『咦？原來我以前覺得咁take it for granted嘅嘢，原來唔係咁。』因為以前我哋細個，成日跟住啲師兄師姐去好多唔同嘅舞台做佢哋演唱會嘉賓，佢哋俾呢個機會我，我今日先可以有機會有一個屬於自己嘅舞台，所以我同自己講如果當我有一日有自己嘅舞台，我會將呢個機會承傳落去。因為喺排舞嘅時候我真係見到佢哋有好大嘅熱誠，好專業。」
到Encore環節，Kenny突然於觀眾席驚喜現身，歌迷即時瘋狂向佢派利是，場面熱鬧又搞笑。隨後第二次Encore佢唱《死性不改》時更發揮搞笑本色：「新年流流，唔好咩性不改，叫《靚性不改》啦，大家今年繼續靚呀。」令全場再次歡呼兼爆笑。
