視后佘詩曼一向毫不掩飾對偶像嘅崇拜，曾公開讚張曼玉「太有型」，獲對方親手製作禮物，令阿佘開心到爆，阿佘亦曾獲周潤發親自教學演戲，大讚發哥親切。阿佘初七喺社交平台貼出與偶像發哥嘅合照，同場仲有久未公開露面嘅白茵姐。
相中見阿佘、苗僑偉、戚美珍、黃宗澤（Bosco）、吳卓羲等藝人跟發哥及白茵姐相約一齊新春團拜，阿佘見到發哥頓時變「小粉絲」，興奮大曬與發哥嘅合照，稱「人生第一張同發哥嘅Selfie」，阿佘憶起曾喺舊清水灣片廠飯堂，食食吓飯突然間見到發哥行入嚟，興奮到成個人彈咗起身。
阿佘於2000年拍TVB 經典劇集《十月初五的月光》飾演「祝君好」走紅並人氣急升，原來發哥都有留意佢演出，阿佘記得有次接到藝員部高層電話，叫佢第二日去訓練班上堂：「我仲拗晒頭話：「吓，上堂？我要開工喎！」我仲記得佢話：「去啦，夾晒你啲時間㗎喇。」我心諗…無啦啦上乜鬼堂呀…攰到死…第二日死死地氣，因為未上過訓練班，仲行錯晒路。入到課室，梗係全部人都唔識啦，勁尷尬，求其搵咗個位坐低。張凳都未坐暖，我又『彈』喇！因為原來嗰堂係發哥親自教學！」
myTV SUPER重溫《十月初五的月光》
阿佘笑稱「發哥話知道我係邊個，因為佢睇咗《十月初五的月光》，嗰刻雖然我外表表現得好平靜（話晒喺好多訓練班同學仔面前），但係其實我內心已經放晒煙花 💥💥」，阿佘又指作為小粉絲，雖然未有機會同發哥合作，但係呢次同發哥有得影合照，感覺都係勁浪漫、超溫馨！
而資深演員白茵因擅長飾演尖酸刻薄婦人角色，形象深入人心，於2014年拍完劇集《大藥坊》後息影，正式退休，不過多年嚟仍與圈中好友保持聯絡，不時相約飯敘。
