TVB新劇《臥底嬌娃》一眾演員初六齊齊著到紅噹噹出席宣傳活動，向現場觀眾大派閃卡，陳瀅與羅毓儀呢日先開工，農曆新年放假過得好充實。
陳瀅目前仲係單身，被好姊妹JW催拍拖，JW仲出招寫嘅「馬上有仔」揮春，陳瀅笑指貼咗喺屋企桃花樹對面，啲朋友去佢屋企見到都嘩嘩聲。
羅毓儀與男友林俊其（Kris）透過《女神配對計劃》配對成功，二人在蜜運中，新春期間跟男友返廣州拜年，見晒男友所有親戚，收咗好多利是。馬貫東為咗呢套劇於兩個月火速減咗20磅，仲挑戰唔少親熱場口同跳舞戲份，馬貫東更同張曦雯及黃子恆關係複雜。
鍾柔美（Yumi）呢日獲唔少粉絲到場支持，Yumi回應早前引起嘅風波，稱過咗去嘅嘢，自己上咗一課，希望大家繼續支持佢，將來戀情順其自然，Yumi與劉展霆仍維持好朋友關係。
《臥底嬌娃》今晚起 星期一至五晚 20:30 翡翠台