《中年好聲音》家族愈來愈大，喺年初六晚三輯中聲嘅戰友就齊集舉行新春團拜，一大班人齊齊BBQ賀年𢭃利是，現職廚師嘅 顏志恒 仲喺現場做大廚為大家炮製食物。
近幾年農曆新年都能夠秉承住呢個傳統，全靠 車婉婉 同 周吉佩 嘅努力維繫，婉婉憶起最初做首輯中聲，比賽時正值新年舉辦第一次團拜交流，當時佢做發起人負責訂香檳，一搞就搞咗好幾年，每年都會約埋新一屆中聲家族團拜開心吓，拍住第一季嘅周吉佩同 支嚳儀 i佢哋，獲封中聲精神領袖，婉婉又指雖然冠軍只有一個，但只要大家團結就係贏。
《中聲2》嘅戰友出名玩得癲，新正頭未過 陳俞霏 仲即場拆利是，睇吓有幾咁豐收，而從事設計行業嘅 譚輝智 對大家嘅利是封都好講究，大讚自己設計嘅利是封獨特之處，解構利是上面銀碼嘅暗號仲踩 劉威煌 個利是封唔夠靚，仲笑言下年可以免費幫佢設計。
古淖文 農曆年工作密麻麻，正所謂連日開工，紅包大封！現場一眾好友無論已婚戓未婚都搶住同佢𢭃利是，個個都話自己喺German面前係大細路， 顏米羔 就指劉威煌係前輩，阿古係大佬。
張與辰 今個新年難得留港度歲，除咗享受傳統氣氛之外，更胃口大開食盡賀年糕點，自爆年初二一餐就食咗半底蘿蔔糕，之後又勁食榴槤，而 李金凱 日前就返回家鄉雲南過年，同樣大飽口福，並激讚家鄉食物美味，有機會會邀請中聲同學仔到雲南吃喝玩樂。
