三位樂壇新人 占士丁丁 梁煒謙 同 陸海悠 早前趁新年聚首一堂，向全港巿民拜年，祝願大家都馬年都開心愉快。
剛過去嘅蛇年係佢哋嘅新人年，三人都認為係難忘嘅一年，同時亦有需要改進之處。丁丁最想增加工作量：「蛇年好神奇，我同Eric Kwok組成DJ組合『HOHOONE』，仲推出廣東歌《我的格言》，真係好開心，但係可以再忙啲，我真係好鍾意做嘢！」
而早前於電台頒奬禮獲得新人銀奬嘅Vince，就認為蛇年係豐收年：「出道第一年真係試咗好多新嘢，最預計唔到係年尾仲攞獎，但都有啲唔滿意，特別係身材上，我讀中學時有六嚿腹肌，所以希望新一年能夠操返fit。」
至於以跳唱為主嘅Hazel，就開心出道短短一年演出已相對穩定：「我滿意嘅就係𠵱家唱歌跳舞唔會喘氣，我唔滿意嘅就係有時唱歌仲會走音。」
丁丁雖然只喺香港居住兩年，不過加上過往於內地生活8年嘅經驗，所以過年一啲都唔陌生：「見過舞龍舞獅同燒炮仗，真係好熱鬧好好玩，有機會都想再見到。我最鍾意𢭃利是，恭喜發財！利是𢭃來！最鍾意食蘿蔔糕同埋炸油角！好好味！」
而愛熱鬧嘅Vince就至愛新年節日氣氛：「新年就最鍾意食蘿蔔糕，總之係澱粉類嘅食物我都鍾意。至於最難忘就係舊年，雖然當時我仲未正式出道，但係已經有機會去電台嘅團拜活動，見到好多藝人朋友。作為一個仲未出道嘅新人，所有嘢都好新鮮好神奇。」
Hazel新年就一定會同家人團聚：「我好鍾意行花巿，同埋同屋企人食團年飯，我特別鍾意食就係蘿蔔糕同埋年糕。我最難忘嘅一個新年，就係舊年同表弟表姐一齊去玩機動遊戲。」
新一年已經來臨，佢哋亦各有不同願望，丁丁就話要學好廣東話：「學好廣東話可以出多啲廣東歌，最希望有機會可以開到演唱會。另外，HOHOONE新年會去杜拜演出，希望新一年可以去更多地方表演。」Vince就希望音樂上有所突破：「希望喺歌曲創作上多啲參與度，曲詞編監每個崗位都可以試多啲，大家都會喜歡我嘅作品，其實我仲有個演員夢，希望喺演員呢條路上面可以再探索吓唔同嘅可能性。」至於Hazel就希望新一年挑戰唱慢歌：「我希望寫多啲唔同嘅歌，譬如廣東歌同埋慢歌，另外可以有機會試吓演戲。」