年假期間好多藝人都喺社交平台晒出外遊相， 周汶錡 同法籍老公Julien就帶埋兩個囝囝返鄉下法國度假，一家四口仲去咗滑雪。見Kathy一時喺室外大雪紛飛，一時又返室內嘆美食同香檳，兩個囝囝同媽咪喺雪中席地而坐影相，玩得好開心。
由Kathy社交平台post嘅相，一家四口應該係去咗位於阿爾卑斯山嘅知名滑雪勝地梅傑夫度假，Kathy以「This holiday couldn't have been better!」來形容自己度假嘅心情。
Kathy同Julien於2012年結婚，雖然曾經傳出因為老公Julien花弗導致婚姻亮紅燈，但事實證明兩公婆關係不變，而兩個分別十歲同八歲嘅混血囝囝遺傳咗父母嘅良好基因，越大越靚仔，年初二Kathy亦有post兩兄弟著唐裝嘅拜年相，配上混血五官，非常可愛。
